كل عام وأنتم بخير! إذن.. ما هي أهدافكم للسنة الجديدة؟

بسم الله الرحمن الرحيم

ها هو عام آخر يطوي صفحاته ليذهب بلا عودة. آخذا معه لحظاته المرة والحلوة.

و عام آخر يطل علينا كصفحة بيضاء خاليه.. ترى؟ مالذي سيكب على هذه الصفحة؟

كل عام وأنتم إلى الله أقرب وبألف صحة وعافية!

طيب.

صراحة.. يوم الأربعاء ما كنت عارفة إنو آخر يوم للسنة.. 

شفت في تويتر ريتويت إنوا آخر يوم وكده.. فأنا كنت: اووووه ..

مرة ما جا على بالي.. المهم رحت الجامعة ورجعت وبرضوا نسيت الموضوع.. بس بعدين لمن الشمس بدأت تغرب افتكرت قلت: اوف! خليني أطلع السطوح أتفرج على الغروب.

وطلعت السطوح وقعدت أتفرج على الغروب .. عايشة الجو..قلك إنو آخر يوم في العام وكده.

على العموم..

عام راح وعام أتى سواء حققت في العام الي فات أهداف وحركات وكده أو لا.

عندي اقتراح

ايش رايكم تحطوا هدف..بل أهداف للعام الجديد؟

أي هدف ممكن يخطر في بالك: تحفظ قرآن, تجيب درجات عالية, تكتب كتاب, تنحف! أي شي

وأحسن لو تكون موثقة.. عشان العام الجاي إن شاء الله تطلع عليها وتشوف: هل حققتها ولا لأ؟ طيب كم هدف؟ كلها؟ بعضها؟ هدف واحد؟

ممكن تكتبها في ورقة أو ممكن إنك تصور نفسك بالكاميرا, وأشرك معاك كم شخص.

يعني..

جيب كاميرا وأبدأ صور فيديو.. قول أنا إن شاء الله ناوي هادا العام إني أعمل كده وكده وكده.. بعدين روح لامك وأبوك وأخوانك وأخواتك.. أو ممكن أقاربك أو أصحابك.

بس لا تحسسهم إنوا استجواب كمان..

عادي أمزحوا صورهم وهما بيطبخوا أو يقرأوا.. المهم بس إنك توثق الأهداف

شاركوني أهدافكم هنا كمان.

ويا رب يكون عام جديد مليء بالطاعات والأهداف الحلوة.